John Maynard Keynes កើតនៅថ្ងៃទី០៥ ខែមិថុនា ឆ្នាំ១៨៨៣ នៃទីក្រុង Cambridge ។ លោកមានមុខជំនាញទៅលើសេដ្ឋកិច្ចសម័យទំនើបនិងទ្រឹស្ដីនយោបាយហិរញ្ញវត្ថុជាច្រើនទៀតក្នុងជួររដ្ឋាភិបាល។
ហើយគាត់គឺជាសេដ្ឋកិច្ចវិទូមួយរូបក្នុងចំណោម
បិតានៃទ្រឹស្ដីម៉ាក្រូសេដ្ឋកិច្ចសាស្រ្តសម័យទំនើបផងដែរ ។
ក្នុងទសវត្សរ៍ទី២០-៣០ កេនស៍ បានយកចិត្តទុកដាក់សិក្សាពីបញ្ហារូបិយវត្ថុ ។ ស្នាដៃដ៏ល្បីរបស់លោកគឺ
“ទ្រឹស្ដីរួមស្ដីពីអនិកម្មភាព អត្រាការប្រាក់ និងរូបិយវត្ថុ” ត្រូវបានផ្សព្វផ្សាយយ៉ាងទូលំទូលាយក្នុងឆ្នាំ១៩៣៦ ។លោកកេនស៍បានអះអាងថា នៅក្នុងសេដ្ឋកិច្ចទីផ្សារ ដើម្បីជម្នះឧបសគ្គបានលើបញ្ហានិកម្មភាពរដ្ឋត្រូវមានគោលនយោបាយរូបិយវត្ថុសកម្មមួយ ដែលលើកទឹកចិត្តដល់តម្រូវការ ។ ពាក់ព័ន្ធកង្វះខាតសេដ្ឋកិច្ចទីផ្សារ និងតួនាទីរបស់រដ្ឋ លោកកេនស៍បានគូសបញ្ជាក់ថា “រដ្ឋត្រូវធ្វើអន្ដរាគមន៍ក្នុងសេដ្ឋកិច្ច តាមរយៈគោលនយោបាយសារពើពន្ធសម្រាប់ផ្ដល់ការលើកទឹកចិត្តដល់តម្រូវការ ទើបអាចដោះស្រាយបញ្ហានិកម្មភាពបាន” ។ ដើម្បីបង្កើន “តម្រូវការ” រដ្ឋត្រូវអនុវត្តគោលនយោបាយបង្កើនចំណាយសាធារណៈ ឬកាត់បន្ថយអត្រាពន្ធ ។ កំណើនចំណាយសាធារណៈប្រព្រឹត្តទៅតាមរយៈការបង្កើនផ្នែកសាធារណៈ ឬបំពេញសេចក្ដីត្រូវរបស់ប្រជាជនតាមរយៈការផ្ដល់ថវិកាសម្រាប់សោធននិវត្តន៍និងមនុស្សចាស់ជរា និងការផ្ដល់អាហារូបករណ៍សម្រាប់សិស្ស-និស្សិតជាដើម ។ តាមរយៈការផ្ដល់នេះ នាំឲ្យកើនឡើងនូវ “កម្លាំងទិញ”និងការបង្កើនឡើងនូវ “តម្រូវការរួម” ក្នុងសេដ្ឋកិច្ច ។ នៅពេលដែល “តម្រូវការរួម” កើនឡើងនាំឲ្យកើនឡើងនូវផលិតកម្ម និងទីបំផុតគឺកំណើន “តម្រូវការ”នៃកម្លាំងពលកម្ម ។ កំណើន “តម្រូវការ”នៃកម្លាំងពលកម្មមានន័យថា មនុស្សមានការងារធ្វើ មានប្រាក់បៀវត្សរ៍ នឹងធ្វើឲ្យកើនឡើងនូវ “កម្លាំងទិញ”ថែមទៀត ។ ប្រការនេះ នាំឲ្យមានការវិនិយោគទុនថែមទៀតទៅលើផលិតកម្មទំនិញនិងសេវា ព្រមទាំងបង្កើតឲ្យមានការងារធ្វើ និងប្រាក់បៀវត្សរ៍និងកំណើនសេដ្ឋកិច្ចក្នុងប្រទេសទាំងមូល ។
0 comments:
Post a Comment